Sarebide proiektua aurkeztu dugu NAVARREFA-POCTEFA Nafarroako proiektuen aurkezpen jardunaldian

Euskarazko hedabideen arteko lankidetza teknologikoa, plataforma digitalen garapena eta adimen artifiziala dira Sarebideren lan-ardatz nagusiak. Hiru urteko proiektuaren bidez, euskararen erabilera sustatu eta euskarazko edukien zabalkundea handitu nahi dugu.

Sarebide proiektua NAVARREFA-POCTEFA Nafarroako proiektuen aurkezpen jardunaldian aurkeztu dugu. Topaketaren baitan, proiektuaren helburuak, lan-ildo nagusiak eta datozen urteetarako aurreikusitako urratsak azaldu ditugu.

Sarebideren helburu nagusia euskararen erabilera sustatzea da, Euskal Herriko lurralde guztietako hainbat hedabideren arteko auzolana eta lankidetza oinarri hartuta.

Horretarako, bi erronka nagusiri heldu nahi diegu: batetik, inguruan gertatzen dena modu eraginkorragoan kontatzeko tresna teknologiko berriak garatzea; bestetik, euskaraz sortutako edukiak audientzia handiagoarengana iristeko bideak eskaintzea.

Hiru lan-ardatz nagusi

Sarebide proiektua hiru lan-ardatz nagusiren inguruan antolatu da.

Lehenengoa lankidetza teknologikorako sare bat sortzea da. Horren bidez, hedabideek tresna teknologiko partekatuak garatu ahal izango dituzte, eta, aldi berean, bakoitzaren azpiegiturak eta baliabide teknologikoak hobetuko dira.

Bigarren ardatza plataforma digitalen garapena da, euskarazko edukien zabalkundea handitzeko. Bi proiektu nagusi biltzen ditu:

  • Ikus-entzunezko plataforma bateratua, edukien eskaintza modu koordinatuan eta teknologia berrienak erabiliz eskaintzeko.
  • Musika plataforma berria. Horretarako, Badok webgunea berrituko da, streaming bidez musika entzuteko sistema egoki batekin eta informazio gaurkotuarekin. Euskal musikaren ekosistema osoaren zerbitzura egongo den plataforma izatea da asmoa.

Hirugarren ardatza adimen artifiziala da. Teknologia horren aukerak baliatu nahi dira kazetaritza hobetzeko, hedabideen eguneroko lana errazteko eta erabiltzaileei zerbitzu hobeak eskaintzeko tresnak garatuz.

2027rako lehen urratsak

Proiektua onartu zenetik hainbat urrats egin dira, eta datozen hilabeteetarako egutegia ere zehazten ari da.

Aurreikuspenen arabera, 2027ko hasieran zerbitzarien azpiegitura martxan egongo da. Udaberrian, berriz, ikus-entzunezko plataforma bateratua garatzen hasiko dira. Musika plataforma berriari dagokionez, 2027aren amaierarako martxan egotea espero da.

Euskalerria Irratia, eraldaketa horren adibide

Sarebidek hedabide bakoitzaren eguneroko jardunean izango duen eragina hobeto ulertzeko, Euskalerria Irratiaren esperientzia da adibideetako bat.

Iruñeko irratia komunikabide multiplataforma bihurtzeko bidean dago. Horretarako, 300 metro koadroko egoitza berri batera lekualdatu da, teknologia digital aurreratuarekin hornituta.

Instalazio berrien artean, 80 metro koadroko plato-estudioa dago, sei kamera digitalekin, sei metroko LED pantailarekin, musikarientzako gunearekin eta publikoarentzako espazioarekin.

Azpiegitura horri esker, Euskalerria Irratia Visual Radio, bideopodcast eta bestelako ikus-entzunezko edukiak lantzen ari da, baita komunitateari irekitako ekitaldiak antolatzen ere.

Testuinguru horretan, Sarebide proiektuak ekarpen zuzena egiten dio irratia indartzeko prozesuari, soinu-kontsola hobeak eskuratzeko eta instalazioen egokitzapen akustikoa hobetzeko aukera emanez.

Auzolana eta etorkizuneko erronkak

Sarebide hiru urteko proiektua da, eta oraindik lan handia dago egiteko. Hala ere, lehen urratsak emanda daude, eta euskarazko hedabideen arteko elkarlana indartzeko, azpiegitura teknologikoak hobetzeko eta euskarazko edukien zabalkundea handitzeko lanean ari gara.

NAVARREFA-POCTEFA jardunaldian egindako aurkezpenak proiektuaren nondik norakoak eta etorkizuneko erronkak partekatzeko aukera eman digu.

Helburua argia da: elkarlanean aritzea, teknologia berriak baliatzea eta euskarazko komunikazio-esparrua indartzea.